“Eis Funsionariu MSS Halo Kobransa Ba IDPs”

.

Jornal Nacional Diario - Sesta-feira, 28 Junho 2013 

 Eis Funsinariu Ministeriu Solidaridade Sosial (MSS) ho inisial TFS bosok familia dezlokadus hamutuk nain 150 resin hodi fo osan bolsu ba nia atu prosesa lalais vitima sira ne’e nia dokumentus atu hetan sira nia direitu rekoperasaun ba uma ahi han iha krizi 2006. 

Husi kobransa ne’e, kada familia hatam osan bolsu hahu husi U$50 to’o 200, maibe to’o agora direitu ba osan rekoperasaun IDPs vitima sira seidauk hetan. 

Informasaun ne’ebe JNDiari asesu husi ofisial Justisa husi Tribunal Distritu Dili (TDD) katak, arguidu halai lakon ona ba hela iha Baucau, maibe parte Polisia seidauk kaptura hodi aprezenta ba Tribunal, mesmu julgamentu kontinua lao dadaun ona iha Tribunal. 

Sasin balun esplika katak, sira fiar noa fo osan bolsu nian ba eis Funsionariu MSS ne’e tanba vitima halo promesa hodi tau garantia katak, nia sei prosesa lalais dokumentus atu hetan osan rekoperasaun ba vitima IDPs sira. 

“Ami fiar tanba dehan, nia servisu iha Ministeriu Sosial, nia mak hatene hotu prosesu pagamentu ba IDPs, nia mos husu ami atu fiar nia fo hela kopia kartaun eleitroal ida-idak baa mi atu sai hanesan baze legal,” Vitima ida hateten ba JNDiario. 

 Julgamentu ba kazu ne’e, kontinuasaun iha loron 18 Julhu mai Tribunal sei rona deklarasaun husi sasin nain lima hanesan, Jose da Costa, Armanda, Maria, Madalena no Jamito. 

.