Hein Prosesu Julgamentu “Timor Oan Iha Filipina Sei Iha Prizaun Preventiva”

.

Jornal Nacional Diario - Sesta-Feira, 14 Junho 2013 

Vice Ministru negosio Estranjeiru no Cooperacao (MNEC) Contancio Pinto informa katak, bolseiro Timor oan ne’ebe mak diskonfia halo violensia seksual hasoru feto Filipina iha tinan kotuk, oras ne’e dadauk sei iha prizaun preventiva hodi hein prosesu julgamentu. 

“Nia agora iha prizaun preventiva, buat seidauk desizaun final nia labele tama sela lai, iha prizaun preventiva,” dehan Vice MNEC, Constancio Pinto ba Jornalista sira iha Palacio Prezidensial Aitarak Laran Dili, Kinta (13/6) hafoin hasoru malu ho Prezidenti da Republika Taur Matan Ruak. 

Kazu bolseiru Timor oan, Marcelinho Azino da cruz (MAC), diskonfia hala’o violensia seksual hasoru feto Filipina iha Filipina, oras ne’e dadauk autoridade justisa Filipina nian haree no Ministeriu Negosiu Estranjeiru no Cooperasaun liu husi Embaixada Timor nian iha Filipina maka tau matan ba problema ne’e. 

“Agora intrega ba justisa no ita nia autoridade justisa iha ne’eba depois sira maka haree para depois Ministeriu liu husi embaixada iha ne’eba tau matan nafatin, nune’e justisa ne’e sira bele la’o diak ho justu tuir buat ne’ebe maka nia halo no la halo depois maka ita rona nia rejultadu,” dehan Constancio Pinto. 

Tuir informasaun katak, bolseiru Timor oan ne’ebe mak deskonfia halo violasaun sexual hasoru feto Filipina ne’e presiza osan atu selu advogadu hodi salva nia iha Tribunal, maibe to’o oras ne’e MNEC no Ministeriu edukasaun (ME) seidauk haruka osan ba bolseiru ne’e. 

“Ami sei haree halo nusa maibe iha liur ne’eba ne’e ita la hatene maibe presiza osan para atu selu advogadu sira oinsa bele apoia orsamentu par abele kompletamente ho kazu ida hanesan ne’e,” dehan Constancio. 

Vice MNEC hateten, Ministeriu liu husi embaixador sira iha atu fo protesaun ba Timor oan sira ne’ebe maka iha rai liur maibe kazu ne’e sei iha prosesu nia laran, tanba ne’e espera kazu ne’e iha investigasaun bele lao ho diak no bolseirus ne’e labele komete krime ne’ebe maka hamoe naran Timor Leste iha rai liur. 

.