“Estadu Timor-Leste Dezemprega Intelektuais”

.

Jornal Timor Post - Kinta-feira, 27 Junho 2013 

Diretor Komisaun Justisa no Paz Dioseze Baucau, Padre Martinho Gusmao hateten, Estadu Timor-Leste halo ona investimentu maka’as iha rekursu umanus maibe to’o ohin loron kontinua tau fiar liu ba ema internasional hodi hamosu planu ruma ba dezenvolvimentu, tanba ne’e, nia konsidera estadu TL dezemprega intelektuias. 

“Ministru dehan ita dezemprega intelektual, sim ita intelektual laiha servisu,” hateten Amu Martinho ba Jornalista Timor Post, Kuarta (26/6), wainhira sai orador iha seminariu ne’ebe hala’o iha Seminariu Maior Fatumeta, Dili. 

 Padre Martinho hateten, oras ne’e ita sofre moras ne’ebeke seidauk bele kura to’o agora, “Malae Minded” ne’e dehan katak, ita nia kakutan nakonu ho malae, malae koalia nia maka matenek no hateten, Timor-oan mak koalia nia beik, nia la hatene mezmu ke nia nivel edukasaun Timor-oan boot liu malae nian, tan deit nia malae, ida ne’e ita sofre buat ida ne’e. 

 Tanba ne’e, kundu Timor-oan ida koalia haka’as malu hatun a’at didiak, maibe malae id akoalia portugues no inglesh dada deit, entaun nai ulun Timor-Leste mata mutin tur tiha. 

“Hau dehan ida ne’e sofrementu boot, kuandu estadu la fo oportunidade ba intelektual Timoroan para suporta, ita la ba oin,” dehan Komisariu CNE ne’e. 

Padre Martinho fo ezemplu, sobre implementasaun desentralizasaun hanesan agora dadaun iha, Univesidade Nasional Timor Lorosa’e (UNTL) iha ema mestradu, Doktor, ho titulu oi-oin maibe halo seminariu kona-ba Munisipiu, Governu bolu husi Portugal no Australia mak fo. 

“Ita nia Governu gasta tiha osan ba UNTL, envez haruka ita nia dosente sira mak halo konsep no servisu maibe bolu fali ema husi liur mai mak halo konsep, tamba ne’e, ita gasta osan saugate deit, tanba ne’e laos intelektual deit mak dezempregu maibe estadu mos dezempregu ontelektual,” haktuir Padre Martinho. 

Portantu, kona ba kontribuisaun Igreija Katolika nian iha edukasaun, Eis Komisariu CNE ne’e haktuir katak, nudar ema uma kreda nia sempre hanoin edukasaun forte no abut liu mak katolisidade, se igreija la kontribui ba edukasaun diak, entaun bele dehan igreija lakon nia vokasaun.

,