“PN Loke Tender Fo Han Deputadu”

.

Jornal Independente - Tersa-feira, 18 Junho 2013 

Parlamentu Nasional (PN) prepara hela prosesu ba tenderizasaun hodi prepara han meudia no snack ba deputadu sira iha uma fukun Parlamentu nasional (PN). Sekretariu jeral PN, Mateus Ximenes Belo hateten, oras ne’e dadaun loke ona konkursu 3, fornesementu hahan, fornesementu snack no ajensia viazen ba membru Parlamentu Nasional sira. 

“Konkursu ne’e hau rasik mak hakarak loke, tanba kompania ne’ebe fornese ne’e kleur liu ona,” dehan nia iha kna’ar fatin, Uma Fukun PN (17/6). 

Tuir nia, kompania barak mak hatama ona sira nia dokumentu hodi fornese hahan no snack, ne’ebe sei halo selesaun iha tempu badak nia laran. Maibe, ba konkursu ajensia viazen nian seidauk prienxe criteria, tanba atu halo selesaun minimu tenke iha kompania 3 mak hatama sira nia dokumentu. 

“Ami re-anunsia dala 3 ona, amibe ema (ajensia) sira la apply,” tenik nia. 

Tuir nia, esperensia Parlamentu Nasional laos hanesan orgaun soberania seluk, ne’ebe kuandu halo viazen iha rai liur ema barak mak ba ne’e duni, dala ruma governu deve to’o U$100 mak foin bele selu, tanba ne’e, ajensia sira tauk atu kompete. 

 Maibe nia dehan, kompania ne’ebe kompete iha azensia viazen ba billete ne’e foin azensia rua mak hatama, maibe konkursu seluk ne’e kompania barak mak hatama ona. 

.