“Fronteira Memo Rezolvidu”

.

Jornal Nacional Diario - Segunda-feira, 24 Junho 2013 

Estadu Timor-Leste no Indonesia liu husi Ministeriu Negosiu Estranjeiru Timor-Leste no Indonesia asina ona akordu ida konaba segimentu fronteira ida iha Oecusse Memo no hela fatin rua maka seidauk rezolvidu, Bijael Sunan no Noel Besi iha Oecusse. 

Liu husi Media ANTARA ne’ebe maka Jornal Nacional asesu katak Ministru Negosiu Estranjeiru (MNE) Indonesia, Marty Natalegawa hateten, MNE Indonesia no Ministru Negosiu Estranjeiru no Cooperasaun (MNEC) Timor-Leste, Jose Luis Guterres asina ona akordu ida ba segimentu Fronteira memo nian. 

 Akordu ne’e asina wainhira Prezidenti da Republika (PR), Taur Matan Ruak hala’o vizita Estadu ba Indonezia hodi hasoru malu ho Prezidenti da Republika Indonesia Susilo Bamban Yodiono (SBY) iha Istana Merkdeka Jakarta, Sesta (21/6). Ho akordu ne’ebe mak hala’o ona ba segimentu Memo nian hatudu katak, segimentu tolu iha lina Fronteira entre Indonesia ho Timor-Leste besik atu rezolve hotu ona tanba ida rezolvidu ona no hela segimentu rua mak seidauk rezolve. 

 “Iha loron ida ne’e husi segimentu tolu ne’ebe iha ne’e konkorda hamutuk ona, no ohin ita halo akordu ne’e kona ba Dilumil Memo no sei iha segimentu rua mak ita presiza halo kodensaun tan,” dehan MNE, Marty Natalegawa. 

Nia hatutan, nu’udar Ministru Negosiu Estranjeiru nia sei esforsu maka’as hodi servisu hamutuk ho MNEC Timor Leste, nune’e segimentu rua ne’ebe maka seidauk rezolvidu bele rezolve. MNE, Marty mos hatutan tan katak, husi esforsu Indonesia ho Timor Leste nian mak rezolve hotu Fronteira trestre maka sei hahu halo diskusaun konaba Fronteira Maritima. 

“Ita tenki servisu maka’as para rezolve hotu tiha segimentu rua ne’ebe maka sei hela, mak ita sei deskute fali problema Fronteira Maritima nian,” hateten nia. 

Maske nune’e, Xefi Diplomasia Indonesia nian ne’e labele determina, wainhira mak bele rejolve problema segimentu rua ne’ebe maka seidauk rezolvidu, maibe Ministeriu Negosiu Estranjeiru Indonesia no Timor-Leste sei servisu maka’as hodi halo dialogu ho komunidade ne’ebe mak hela iha lina Fronteira, liu-liu iha area segimentu rua ne’e nian, nune’e bele hetan solusaun ne’ebe diak. 

 “Tanba ida ne’e tenki servisu no rezolve ho kuidadu, sei diak liu wainhira rejolve hotu iha tempo ne’ebe labele kleur liu,” nia hatutan. Iha biabn ne’e mos Timor Leste no Indonesia mos halo konsensu hamutuk atu loke postu Fronteira iha Tnubibi, Bobonaro, Memo Oecusse no Pasabe. 

,